男生圍:義氣超人王喜

有志雲,有王喜。 9個月下來,陳志雲由涉貪被捕至上月戲劇性復職,遊走天堂地獄間樹倒猢猻散,惟獨王喜撐到底,為老友放生積福、遮風擋雨。私底下,兩個男人情義兩心知;工作上,就繼續楚河漢界。
王喜形容自己半世人「僥倖開始,糊塗經過」。陷入中年危機的他為衝破事業樽頸位,近年學風水、寫劇本,計劃兩年後執導演筒,炮製他的博攞獎「小電影」,講述人生三部曲老、病、死,並擬邀志雲擔演「病」的部份,為他的影途畢業作寫上雲一般的完美句號。
撰文:朱倬誼、何慧斯

「一世人,朋友有幾多個?能夠做就做多啲。」王喜這樣說過。因而他不怕閒言撐志雲,被網民封為正義朋友。攝影:陳順禎

「一世人,朋友有幾多個?能夠做就做多啲。」王喜這樣說過。因而他不怕閒言撐志雲,被網民封為正義朋友。攝影:陳順禎

友共情

無綫總經理陳志雲今年 3月涉貪被捕後,昔日愛將人人彈開,甲說:「同佢唔熟。」乙又說:「冇佢電話。」人情冷暖,志雲自知。跟志雲結緣於商台的王喜,眼見相識 18年的老友落難,他話之你笑他跟出跟入,硬要跟志雲風雨同路,陪他上庭、食飯、傾心事,為他狂放生積福,甚至甘願賣樓打官司。網民封他正義朋友,倒是王喜受之有愧,老是說:「我冇做過值得表揚嘅事,只係盡一般朋友責任,佢身邊好多朋友出力 o架,我幕前人易引起大家注意啫,每個市民都係咁做,朋友都係咁相處 o架啦。」

為志雲一殼眼淚

志雲上庭,王喜擔遮侍候,兩人風雨同路見真心。

志雲上庭,王喜擔遮侍候,兩人風雨同路見真心。

這天,王喜在尖沙嘴接受本報訪問,講開友共情,他笑說:「以前我喺內地登台,司儀介紹我出場,通常會話有請《烈火雄心》嘅男主角王喜,但最近變咗係有情有義嘅王喜,搞到啲老闆走嚟問我:『乜你最近拍咗套戲叫《有情有義》咩?』我咪話講出嚟盞一殼眼淚,唔係好嘢嚟。我哋呢啲喺旁邊檢便宜嘅梗係冇所謂,但對當事人嚟講,其實唔係好容易過嘅事。」
話中不無感慨,有些事情的過程,真的很難捱。如王喜,往時年少火猛,心直口快,一心想事情好,卻因為表達不力誤會連連,是非多到當飯食,他也知道自己時有不當,隨着年歲漸長,年前西藏炒車死過翻生的經歷,還有志雲事件,他變了很多。
王喜說:「你問我係咪做人開心咗?我覺得應該話我身邊嘅人開心啲,人哋見到你咁嘅樣,都唔知點開解你,同你做訪問又要小心翼翼,怕唔小心拮到你條尾,生活仲有好多嘢,唔係淨係得工作,你可以建立興趣理想嗜好。陳生係一個好鮮活嘅例子,好實在話畀你知要好珍惜身邊每一個人每一件事同每一分鐘,要好好把握,一件事係唔會摧毀你一生。」

人生跌撞是非多

入行 14年,王喜暫時總結「僥倖開始,糊塗經過,光輝未來」。他解釋僥倖源由:「入行時冇人教你點做藝人,點樣生存,自己跌跌撞撞,好多起起落落是是非非,與此同時我喺《烈火》嘅演出得到大家讚賞,至令大家開始知我呢個人,但又唔知點定位。做電視演員去到樽頸位啦,有人識但唔係蜚聲國際,又唔可以再進一步,我卡喺呢個位都唔止一年啦,所以我話自己嘅起步係僥倖,一入行做男主角,接過好多好劇集,同過好多優秀演員合作,先會有呢個知名度,但又冇辦法更上一層屢,都幾迷茫。」

相型男
吹捧嘉穎林峯

90年代的無綫,彈起小生各具特色,招牌作零舍多,王喜是 flaming heart、陶大宇是師奶殺手、吳啟華是程至美、羅嘉良是大頭文等,反之 21世紀的小生人多但代表作欠奉。問王喜睇好來年那個上位,他點名鄭嘉穎和林峯。
王喜笑說:「鄭嘉穎係典型俊男,只要佢演技再昇華層次,前途無可限量,下年可以打低黎耀祥。林峯係全港型男指標,相信佢嘅指標有影響力,拓展到亞太區。無綫唔係鬧小生荒,觀眾要適應。」儘管他和嘉穎曾傳不和,但他強調這是真話,你信唔信?

王喜點名指俊男鄭嘉穎(圖)和林峯來年更紅,黃浩然就勝在表現多元化。資料圖片

王喜點名指俊男鄭嘉穎(圖)和林峯來年更紅,黃浩然就勝在表現多元化。資料圖片

林峯

林峯

絕讚黃浩然

黃浩然

黃浩然

王喜又自嘲:「我就無能為力啦,僥倖得到香港觀眾喜愛已經家山發,好知足,好似呢排坊間都真係成日講緊《囧探》,問鍾嘉欣係咪鬼?仲有邊個係鬼呀?反應唔錯,好開心啦。」在《囧探查過界》中王喜首次和黃浩然合作,感覺良好,他抵死讚道:「佢好聰明好有喜劇感,佢屬於青筋派演員,比較嚴肅,拍正戲,但佢好巧妙咁將青筋放喺喜劇入面,令到成個表現好有幽默感。我哋臨場發揮改劇本,效果好有趣。」對於另一拍檔鍾嘉欣,王喜也讚賞:「佢好勤力,表裏如一,譬如 o靚模對佢嚟講係陌生東西,會有少少介意扮細個,驚俾人笑,結果佢都擺脫呢個心理,仲好勤力咁了解 o靚模文化,真係好難得。」
王喜最難忘劇中與鍾嘉欣坐在樹椏上談情,熱到一身濕勁攞膽,他說:「夏天 30幾度已經好鬼熱,上到樹椏又冇位走,又要攬又要談情,仲要講兩頁紙對白,仲有好多蚊同蟲,搞到嘉欣差啲跌落嚟,真係好辛苦。」
與拍《烈火》相比,《囧探》當然冇得揮,《烈火》更已成為王喜絕響:「我唔會再拍《烈火》系列,已經去到人體極限,唔係我呢個年紀可以做,咁好嘅機會唔一定次次落嚟我度,好多生力軍都渴望得到呢啲珍貴機會。」

謀後路

從志雲身上,王喜學會很多,他想到演員不一定是他的終身職業,於是開始謀後路,他說:「發生陳生事件後,大家對我嘅品格多少少認識,但已晃眼 14年,對一個年過 40歲嘅人嚟講係中年危機,又唔想被人淘汰,何去何從呢?惟有發掘自己嘅專長,學風水,希望做風水師傅,想喺仲未有嚴重病痛,有氣有力嘅情況下把握健康做啲新嘢,有電影生涯嘅畢業作品。接住落去就冇人知,如果呢兩年喺演戲上有新突破,都會繼續做演員,不過家身處呢個狀態唔係,係好普遍嘅中年危機。」
最近王喜開始寫劇本,希望親自為將來的影途寫上完美句號,他說:「我覺得咁樣嘅結局幾圓滿,希望喺 45歲可以實行,家叫做有初稿,仲搵咗副導演兼編導幫手,但係你知我有鋪癮鍾意改劇本,個副導演已經俾我折磨緊,我相信我臨場都會改,呢個係我天性,所以我都折磨緊自己,逼自己埋牆角希望諗到絕世好橋。」

在成名作《烈火雄心》中,王喜(右一)扮消防員令人難忘。劇照

在成名作《烈火雄心》中,王喜(右一)扮消防員令人難忘。劇照

王喜大讚鍾嘉欣拍《囧探查過界》時夠勤力。劇照

王喜大讚鍾嘉欣拍《囧探查過界》時夠勤力。劇照

轉當幕後好下台

43歲的王喜直認有中年危機,對前途感到茫然。

43歲的王喜直認有中年危機,對前途感到茫然。

王喜續說:「呢個會係博攞獎嘅小型製作,成套戲由三個部份組成,有串連關係但故事獨立,唔會係我自己嘅故事,我亦唔會演,內容講老、病、死,第一女主角係苑瓊丹;病嘅部份係寫我所認識嘅陳生,本來我諗住搵佢幫手拍,但佢推咗我,所以我會搵另一個人去演,不過到時會叫佢審批。」
43歲的王喜,兩年後真的捨得放低自己的幕前事業?他淡然說:「寧願我放低好過被人放棄,係嚟得有尊嚴地下台。如果去到最後一秒先走,就唔知係樽頸定終點,可能係冒險,亦可能唔光彩地離開,可能我係獅子座啦。」
獅子座是強悍的,但王喜也有不惑時。陳志雲的風雨,正好給他借鏡:對事難,對人更難,他說:「睇陳生今次件事,身邊有好多有心有力嘅朋友幫佢,睇番自己真係好僥倖,未有遇上呢啲大問題,我冇 EQ去面對一啲以為係朋友但原來唔係朋友,或者到有事時先知係朋友嘅朋友,因為平時對佢唔好,我會更內疚,呢啲嘢係需要好大嘅智慧面對。」學海無涯,他還在努力學習,等候 EQ成熟時。
場地: The Quarterdeck Kowloon

评论回复