[壹周刊 1044期]号外:涉兩大唱片公司 過百藝員問話 陳志雲貪污案大風暴

貪污案大風暴
斷背禍水 叢培崑

2010年03月11日

陳志雲自從搭上年紀較他小廿三歲,警員出身的同性密友叢培崑( Edthancy)後,便開始交上惡運,在對方影響下,陳志雲逐步遠離身邊朋友,再者,為留住不時嗌分手的叢培崑,最後更惹來一身蟻。
踢走對手

○七年,陳志雲因為接刀片恐嚇信,指他在節目《志雲飯局》中的言論「太寸」,揚言會對他不利,為此,陳總請了兩名私人助理傍實出入,其中一人就是警員出身的叢培崑。身高六呎多,有靚仔助手之稱的他,由於識得氹「老細」開心,又計仔多多,很快就將另一「對手」踢走;雖然被叮出局的另一助手一度表示要爆大鑊,但最終仍被人勸止。叢培崑進一步埋身,成為陳志雲身邊唯一親信。
叢培崑○六年任職九龍區機動部隊,休班時間與友人外出消遣,疑駕駛私家車在錦田公路飛車,導致好友陳燊安死亡,惹上官非,法庭判事件純屬意外,無損傷的叢培崑逃過法律責任。明知在警隊無運行而辭職,不過對好友身亡,叢培崑亦耿耿於懷,眼見身邊人不時自責,令陳總由憐生愛。

直變攣

「阿 Edth同陳總講,覺得自己闖下大禍,欠咗呢個好朋友好多,所以一定要養埋對方嘅屋企人,正因為咁,佢要比其他人更積極搵錢,仲話有算命佬同佢講過,佢三十歲就會死,所以要趁住呢幾年,搵得就搵。其實佢根本就冇理過朋友嘅屋企人,更加冇俾過錢,不過呢番話就打動到陳總,仲支持佢搞生意,喺網上搞購物站賣 T恤,又幫佢搭路,為張敬軒、鄧麗欣演唱會設計紀念品。」陳志雲身邊人透露。
投其所好,本來是異性戀的叢培崑連性取向都變埋,為令陳志雲對他言聽計從,○八年中,他索性進駐陳總位於太子道「香閨」,開始出雙入對的同居生活。不過他於人前人後都強調跟陳志雲是師徒關係,所以就算共處一室,也是分房瞓。
當局者迷

「阿 Edth會同啲識咗好耐嘅朋友講佢根本唔鍾意陳志雲,只係對方黐埋身,又試過喺卡拉 OK飲醉酒,喊住話自己好辛苦要改變取向,跟住個男人。但對住啲新相識嘅朋友,佢就會大讚陳總,話未遇過一個咁叻嘅人,喺對方身上學到好多嘢。
「到得番佢兩個人嘅時候,阿 Edth又會點到陳志雲陀陀擰,陳總乜都唔會 say no,其實好多身邊人都睇唔過眼,不過當局者迷,就算有人開口提,陳志雲都聽唔入耳。呢年幾,好多人都要通過阿 Edth,先搵到佢,因為一到夜晚,阿 Edth就截晒佢嘅電話,隔過晒先俾陳志雲覆機。」知情者透露。

搬出愛巢

去年中,陳志雲因為家中所養、價值百萬的獒犬要有更大地方走動,搬到月租九萬,耗資四十萬裝修的西貢獨立屋,預留了其中一間最大最靚的粉紅色套房給叢培崑。入住唔夠兩個月,陳志雲除了在書展遇上被人柴台以及連串不利新聞外,跟叢培崑的「感情」亦出現問題,身為天主教徒的他,隨即搵高人睇風水,並聽從風水師建議,搬回太子道舊居。
「同咗陳志雲咁多年,阿 Edth不時會飛去台灣,不過次次都係一個人,佢話自己做嘢辛苦,要平衡吓,實則係佢有個女朋友喺嗰邊,加上識人愈來愈多,佢以為靠自己都掂。三個月前,佢仲同陳志雲講要搬走,不過阿 Edth都專登留番條後路,佢話有個澳門相士話佢尅住陳志雲,兩個唔可以一齊住;陳志雲梗係唔想。為咗留住阿 Edth,今年一月陳總搵咗班藝人幫佢大搞生日,又用咗五百幾萬喺何文田山買咗個單位俾佢,條件係要阿 Edth應承每晚返屋企陪佢食飯,十分痴纏。」知情者透露。

睇心理醫生

「愛」有代價,陳志雲亦有苦自己知。自從去年七月中,有人扮 fans在他的新書簽名會掟書,指他可恥後,表面在人前扮無事的陳志雲,事後亦要搵心理醫生幫手。
「俾人公開羞辱,雖然當時佢反應得體,仲俾人讚 EQ高,但其實佢驚得好緊要,呢大半年都要睇心理醫生,加上阿 Edth成日話要分手,佢情緒好低落。其實陳志雲一個月搵成廿萬,根本唔愁錢,但阿 Edth不斷需索,先搞到佢成個人亂晒龍,為咗阿 Edth搞咗單咁嘅事出嚟,好多人都戥佢唔值。」

只愛男將

陳志雲自 00年加入無綫後,得六嬸方逸華賞識,自此平步青雲,更手執朝中大權,多年來力捧了不少愛將。
張繼聰
陳志雲 09年「新寵」,近半年不斷亮相無綫大小節目,去年 11月開始,更被安排主持《正識第一》、《超級巨聲》及《勁歌金曲》。
鄧健泓
深受陳總厚愛的鄧健泓, 07年曾公開以「 Honey」稱呼陳志雲,又公開多謝對方一直給他機會。此外,無綫和四大唱片公司,因版稅風波牽連旗下的歌手遭封殺,但本身是環球歌手的鄧健泓,卻獲欽點留低。
崔建邦
一直是陳志雲重點力捧的愛將,更有望成為「金牌主持」,可惜因涉嫌毆打女友鄺敏慧一案,而停工近三個月,但陳總仍揚言會繼續用他。